السلفيين و اموال الكنائس

قبل اى شئ ، من هم السلفيين ؟؟
هما بيقولوا على نفسهم انهم قوم ينتهجون منهج السلف الصالح ايام الرسول ، طيب ، احنا بقى (اللى هما الليبراليين و العلمانيين) قصدهم ايه بكلمة سلفيين ؟؟

من وجهة نظرى الشخصية ، السلفيين هم مجموعة من الاشخاص يشتركون فيما يأتى :-

1- يستمعون لمشايخ السلفية مثل الشيخ محمد حسان و الشيخ يعقوب و الشيح عبد المنعم الشحات و الشيخ ياسر برهامى و الشيخ الحوينى و الكثيرين

طبعا انا كنت من فترة مش بعيدة بقول حسان حاف كده ، و كنت بزعل لما الاقى السلفيين يقولوا شنودة حاف كده ، رغم انهم بيقولوا شنودة مش حاف ، بعدها فاصل من الشتائم من كل الانواع مثل زنديق و الكلب و المجرم و الشاذ و الخ ....
بس انا طول عمرى ماشى بمبدأ اتعامل باللى تحب الاخرون يعاملوك بيه ، لغاية ما أكتشفت ان الشيخ حسان ليس مجرد داعية ، انما من كبار شيوخ السلفية فى مصر ، و الاخوة السلفيين مش بيؤمنوا بالازهر و عاوزين يقيلوا شيخه ، عشان كده ممكن نعتبر الشيخ حسان او اى شيخ من الشيوخ اللى تم ذكرهم فوق دول ، الكبار بتوعهم ،

زى مثلا انا الكبير بتاعى البابا شنودة الثالث بطريرك الكرازة المرقسية ، كنسيا فقط ، يعنى لما يقولى مثلا متدخلش الكنيسة يوم التلات مأدخلهاش ، الكنيسة طول عمرها ماشية بأسلوب السمع و الطاعة ، لكن لو قالى مثلا روح انتخب بثينة كامل ، و انا عاوز البرادعى ، طبعا مش هسمع كلامه ، لأنه كبيرى دينيا فقط ، كذلك لو قاللى انزل او متنزلش مظاهرات ، ده مش اختصاصه

نرجع لموضوعنا الاساسى

2- هم كلهم مجمعين على ان اى شئ غير الدولة الدينية هو حرام ، مثل العلمانية و الليبرالية و حتى دولة القانون ( الدولة المدنية) ذات المرجعية الاسلامية و الديمقراطية

3- مجمعين ان النصاري قوم كفار لا يجب ان يعيشوا وسطهم مثلهم بل يجب ان يدفعوا الجزية و يحرموا من الوظائف الحكومية و عدم بناء الكنائس و ارتداء الزى الاسلامى و توزيع فلوسهم على باقى الشعب و الكثير

4- مجمعين ان اى واحد يعترضهم هو كافر زنديق

5- مش كلهم بدقون ، اعرف شاب مربي شعره زى توم كروز و مأنتم مع مزة و بيروح جيم و بيلبس تيشرتات ضيقة عشان يبين عضلاته ، و مع ذلك بيستمع لهم و مقتنع بيهم

6- بيفتح الانترنت لمجرد انه يخش على مصراوى و اليوم السابع يشتم على ساويرس حبة و البابا شنودة حبة و الاقباط عموما حبة و الجملة المشهورة اسلامية اسلامية و عامل اكونت على الفيسبوك عشان يشترك فى كل الصفحات و ياخد جملة واحدة كوبي بست فى كل صفحة يقابلها ، يجب الافراج عن اخواتنا المحتجزات ، شنودة رأس الفتنة ، ساويرس الكلب سارق فلوس الشعب ( محدش قال لأمك تجيب خط من شركته او تتعامل معاه اصلا ) ، يجب تفتيش الكنائس للعثور على الاسلحة ، البرادعى ابنته قالعة ملط و متجوزة نصرانى كافر ، و غيرها الكثير

و الصراحة برضه ان الاقباط فى مصر مطالبهم مستفزة جدا ، يعنى ناس عشان يبنوا كنيسة محتاجين تصريح من رئيس الجمهورية ، مافيش سنة بتعدى و الا بيحصل فيها مذبحة واحدة عالاقل للاقباط فى الكنايس ، التعنت فى التعيين بالوظائف و رفض اصحاب الشركات لغير المحجبات ، يقوموا ولا الهبلة يطالبوا بمطالب غريبة جدا !!! تقسيم مصر !! الحماية الدولية !! رئيس جمهورية قبطى !! الغاء المادة التانية من الدستور !! و حاجات مستفزة جدا جدا كتـــــــــير
ولا تصريحات الانبا بيشوى !!! ....

مش موضوعنا برضه ، فى قانون بناء دور العبادة الموحد ، كانوا بينشروا اشاعة او تقريبا مطالب برقابة الدولة على اموال الكنائس...

لو واحد سألك السؤال ده ... طبيعى هترد عليه هتقولوا و هى تبقى فلوس امك ؟؟

لو قلت كده لشاب اخوانى له خبره سياسية ، هيقولك يا اخى انا خايف على فلوسك ، الاباء الكهنة بيغيروا عربياتهم كل 6 شهور ، و عياله مصروفهم 200 جنيه فى اليوم الواحد و كلام كثير.....الخ

يا عم و انت مال امك برضه ؟؟ انا بروح ادفع العشور عشان الاباء الكهنة يصرفوها على بعض بدل ما يرمموا بيها الكنيسة مثلا او يتبرعوا للفقراء ، و انت مال امك بقى ؟؟

نيجى للاخوة السلفيين :) الناس دي بيعجبنى فيها الصراحة ، بس مبيعجبنيش فيها انهم بيرجعوا فى كلامهم ، ماعلينا ، هتلاقى السلفى يقولك انتوا واخدين الفلوس دى من حتتين :) الحتة الاولى فلوس اجنبية لخراب مصر :) و الحتة التانية انكم بتسرقوا فلوس المسلمين زى ساويرس كده :)

بالنسبة للتمويل الخارجى ، اثبت يا حبيبي ، طب ما أنا بأتهمكوا ان قياداتكم بتاخد فلوس من السعودية ، عادى خالص مفيش مشاكل اننا نتهم بعض
:D

بالنسبة لموضوع السرقة بقى ، زمان الاقباط نادرا ما بيشتغلوا فى وظائف حكومية ، و اللى كان بيشتغل فيهم بيطلع عينه ، هما بس كانوا بيبحبوا يشغلوهم عالخزنة عشان عندهم امانة :) وعشان كده
التجأ اغلب الاقباط الى التجارة ، حتى دايما تلاقى اغلب المحلات بتقفل يوم الاحد ، و طبعا احنا عارفين الفرق بين مرتب الموظف و مكاسب التجار ، ده غير ان معظم الاقباط ملتزمين بدفع العشور للكنيسة ، الفقراء منهم قبل الاغنياء
تخيلوا مثلا عائلة ساويرس لو بيدفعوا عشر كل مليم بيجيلهم ، الكنيسة هيبقى معاها فلوس قد ايه ؟؟

عشان كده دايما تلاقى المبانى و الخدمات و المستشفيات التابعة للكنيسة
بدل ما بنبص لفلوس الناس و نقضى وقتنا فى عدّ فلوس الاخرون و الحقد عليهم ، ليه احنا منشتغلش زيادة و نطور من نفسنا عشان نبقى اغنياء ؟؟
ليه مش نستثمر وقتنا فى اشياء مفيدة تنمى مهاراتنا و تفيدنا فى شغلنا و حياتنا ؟؟
ليه بنهتم بأخبار الناس و فلوس الناس ؟؟
ليه مش كل واحد فى حاله ؟؟ و يزود من مهارته عشان يرفع من مرتبه و دخله ؟؟
ليه ؟ !! ؟

الذكر المصري و موسم التزاوج

لو انت زيي بتحب تشوف افلام وثائقية كتير عن الحيوانات

هتسمع الكلمة دى كتير

!!!

مـــــــــوســــم التـــــــــزاوج

!!!

ايوة انا عارف ، ده الموسم اللى بتهيج فيه الحيوانات و بتبتدى فيه التكاثر

للاسف جه اليوم اللى يتشبه فيه المواطن المصري بالحيوان فى موسم التزاوج ، طبعا مينفعش تعدى مناسبة يوم التدوين عن التحرش الجنسي و مكتبش فيه رغم ان عندى امتحانات

:)

من تفكيري المتواضع حبيت احلل اسباب التحرش الجنسي بالنساء فى مصر

يا ترى ده راجع مــــــن :-

1- الكبت الجنسي ؟؟

2- الفصل بين الاولاد و البنات فى المدارس ؟؟

3- تشيئ الانثى فى مصر ، و جعلها وسيلة لمتعة الرجل ، و زرع فكرة انها خلقت للجنس؟؟

4- تتمين العروسة عند تقدم العريس لطلب يدها ؟؟

5- عدم تدريس الثقافة الجنسية فى المدارس ؟؟

6- التدين الظاهرى؟؟

7- زواج المتعة و المسيار ؟؟

8- المواقع الجنسية و تعري المطربات العربيات ؟؟

9- هل تعلم ان هناك تقارير هيئات ومؤسسات دولية أظهرت أن المغرب هي ثاني دولة على صعيد العالم في تجارة اللحم الأبيض، والإمارات العربية تحتل المرتبة السادسة على ذلك الصعيد، ومن أصل 3500 قناة جنسية، هناك 2800 منها مملوكات لأمراء ورجال أعمال عرب، وهي تبث برامجها الجنسية فقط للدول العربية والإسلامية ودول أمريكيا اللاتينية ؟؟

10- هل تعلم ان دخل مصر من السياحة يمثل كم بالمائة من دخلها ؟؟ طب نشوف الفيديو ده ؟؟ ده من فيلم اجنبي عن القاهرة و مشاهد التحرش

http://www.youtube.com/watch?v=JDaPXExP-Hw

11- تعرف الناس او بمعنى اصح بيحسوا بـ ايه او بيبرروا اللى بيعملوه ازاى ؟؟ المصيبة مش فأنهم بيتحرشوا ، المصيبة أنهم بيحللوا اللى بيعملوه ، و من ضمن مايحللوه ، ادعائهم انها امريكية او يهودية صهيونية او نصرانية او كافرة او اى شئ اخر ، لذلك فحلال فيها هو التحرش و الاغتصاب ، يارين نشوف فيديو لارا لوجان

http://www.youtube.com/watch?v=BesZaq5xVgY

12- حتى الفتيات الهاربات من السير فى الشوارع و ركوب الميكروباصات خوفا من التحرش و الاختطاف ، تجد شاب سخيف يقوم بالتضييق على فتاة و احيانا صدم سيارتها ، لمجرد انها فتاة انيقة ترتدى ملابس عالموضة ، لينزل من سيارته هو و اصدقائه و يبدأون بالتحرش اللفظى او الفعلى و ذلك بمساعدة الشباب المار فى الشارع ايضا !! فتاة انيقة تركب سيارة فارهة اذا من المؤكد ان والدها حرامى او ان امها تعمل بالدعارة !! او يقومون بخطفها تحت تهديد الاسلحة

!

لن تتغير افعال هؤلاء الحيوانات الا بعد ازالة هذة الصورة القذرة للمرأة فى ذهونهم ، و بعد كسر حاجز الكبت الجنسي بداخلهم و تغيير هذه الثقافة الشنيعة بداخلهم و ثقافة مجتمع ككل يجعل من المرأة مجرد وسيلة للمتعة و الانجاب

!

شرح موقع تويتر

تويتر موقع اجتماعى ، فيه شبه من الفيس بوك ، بس هوه مختص بالتويتس بس ، و متعرفش تعمل عليه 90% من الحاجات اللى على الفيس بوك ، من الاخر انت تكتب و تقرا ، تكتب و تقرا ، و طبعا ممكن تدعم اللى بتكتبه بصور ، فيديوهات ، اى حاجة تانية ، بس بتحط اللينك و الناس تفتح ، غير الفيس بوك ، يعنى لو عايز تخلى الناس يشوفوا فيديو ، بتحط لينك الفيديو اللى على اليوتيوب ، لو صورة ، ارفعها على اى موقع ، بس فى موقع تبع تويتر بتحط عليه الصور و الفيديوهات و بيبقى اسهل فى المشاركة شوبة اسمه

http://twitpic.com/

تويتر موقع ثقيل ، غير الفيس خالص ، لأنه بيخزن كلمات و حروف بس ، مفيش لا صور ولا فيديوهات ولا حاجة

و رأيي الشخصي ان العقول اللى مدمنة تويتر هى عقول نظيفة ، و طبعا الشباب الغير مثقف ، او بيدور على تسلية فقط ، او مبيحبش القراءة و مبيعملش حاجة فى حياته غير انه يتفرج على صور و فيديوهات عالفيس ، اكيد مش هيعجبه تويتر

تويتر موقع فيه الشتيمة القبيحة عادى جدا ، ولاد و بنات ، و ممكن يكون ده طبيعى نتيجة الانفتاح ، غير الانغلاق اللى على الفيس بوك

و اللى بيساعدك على كده ان اغلب اغبياء الفيس مش يخشوا على تويتر ، فده بيساعدك انك تاخد راحتك

ببساطة عامل شرح مدعم بالصور لموقع تويتر ، بس مش مغطى الموقع كله ، مغطى اللى يخليك تسلك فيه ، و انت تبقى تدوس فيه براحتك

تويتر موقع مفتوح ، طبعا انت ممكن متخليش حد يقرا التويتات بتاعتك غير ناس معينة ، بس ليه ؟؟ هو حلاوته و هو مفتوح كده ،  خصوصا لما تكتب على هاشتاج ، محدش هيقرا اللى هتكتبه لو قافل بروفايلك

تويتر مش زى الفيس فى حاجة ، لو حد عملك فولو

follow

هيقرا التويتات بتعتك ، كده كده انت لو مش قافل بروفايلك زى الفلاحين ، هو هيقرا تويتاتك من غير مايعملك فولو ، بس لما يعملك فولو هتظهر على الـ

timeline

بتاعه ، او الصفحة الرئيسية (الهوم) بمعنى اصح

مش معنى كده انك هتقرا اللى هيكتبه ، الا لو دخلت على بروفايله طبعا ، طب لو عايز تقرا تويتات اللى بيكتبها واحد ، او تظهرلك عالهوم بمعنى اصح ، تعملوا فولو

ايه الهاشتاج ده ؟؟

دلوقتى مثلا فى حاجة بتحصل فى البلد ، او حد بيتكلم فى التلفزيون ، و الشباب كله بيكتب عن الموضوع ، طب انت عايز تقرا عن الموضوع ده ، تبحث عنه لما تلاقى الهاشتاج بتاعه

يعنى مثلا ماتش الاهلى بيلعب فيه ، هتلاقى واحد عندك كاتب عن الاهلى ، و كاتب كده فى التويتة

#Ahly

لو بحثت عن الهاشتاج ده ، هتقرا التويتات عن الاهلى ، بس اللى مكتوب فيها الهاشتاج ده

من اشهر الهاشتاج اللى مبتقفش ، يعنى كل ماتعملها بحث تلاقي فى ناس بتكتب فيها

#Egypt عن مصر

#Tahrirميدان التحرير

#Jan25 ثورة يناير

#May27 ثورةالغضب الثانية

#EgyArmy الجيش المصري

#EgyPolice البوليس المصري

#ikhwan جماعة الاخوان

#salaf or #salafi السلفيين

#copts الاقباط

كل واحد ليه اليوز نيم بتاعه على تويتر ، لو عايز تدور على واحد صاحبك ، اعرف منه اسم اليوزر بتاعه ، بعد كده اعمل عليه سيرش

مثلا اكونت وائل غنيم

@Ghonim

شرح بالصور

فى علامة صح لونها لبنى ، بتلاقيها جمب بعض الاكونتات ، زى اكونت وائل غنيم ، البرادعى ، دى معناها انه الاكونت بتاعه فعلا ، و ان ادارة تويتر اتأكدت من كده

طبعا الحكاية دى مش لأى حد

;-)

بعض الناس الشهيرة على تويتر

@BarackObama

@ElBaradei

@belalfadl

@amrmsalama

@kalnaga

@NaguibSawiris

@salmaeldaly

@amrwaked

@Cristiano

@Mobinil

@GameelaIsmail

@BillGates

@EtisalatMisr

@LINKDSL 

@AlMasryAlYoum_A

@DrEssamSharaf

@YosriFouda

@bothainakamel1

@TahrirTv

@nawaranegm                  

احب افكركوا ان تويتر مليان شتايم قبيحة

دى بعض الاكاونتات اللى عاجبانى بصفة شخصية

بكرر بصفة شخصية

@Heshoz

 @MinaNaguib90

يارب تكونوا استفدتوا

 

لماذا الارثوذكس تحديدا ؟

لماذا يكره السلفيين الاقباط الارثوذكس تحديدا ؟

لماذا البابا شنودة تحديدا ؟

طب ليه مش متضايقين من باقى الطوائف ؟؟

طيب ، دلوقتى هعرض الخلافات بين الارثوذكس و البروتستانت

لو كنت مسلما ، فلت تفهم معظم ما ساكتبه ، لذلك سأوضح الفرق بطريقة مبسطة

البروتستانت بالنسبة للارثوذكس كمثل مجموعة من المسلمين ، لا يؤمنوا بأن الصلاة فرض ، ولا يؤمنوا بصيام رمضان ، ولا يؤمنوا بالمشايخ ، ولا يؤمنوا بالصحابة ولا الاحاديث الشريفة ، والمسجد بالنسبة اليهم هو مجرد بناء مثله مثل اى شقة بدون معمار اسلامى او مأذنة ، والصلاة فى اى اتجاه اى لا يوجد قبله....من الاخر لا يأمنوا بشئ سوى الرسول و القرأن ، حتى اذا قال القرأن الصلاة فرض فأنهم يفسرونها بأنها ليست فرض من اية اخري

فالسلفيين لا يريدون الايمان الصحيح الذى للارثوذكس و يريدونهم ان يلجأوا الى الزواج الميدانى و الطلاق حتى نتشبه بهم ، و عندها يتخلى الارثوذكس عن عقيدتهم 

 الاخوة المسيحين بقى ، ده مجمل خلافتنا مع البروتستانت ، مع بعض التبسيط و الاختصار

1-الارثوذكس يأمنون بالطبيعة الواحدة للسيد المسيح "لاهوته لم يفارق ناسوته لحظة واحدة ولا طرفه عين " اما البروتستانت و الكاثوليك ايضا يؤمنوا بالطبيعة الالهية و الناسوتية ، اى طبيعتين و ليس واحدة

2-البروتستنت و الكاثوليك ايضا يؤمنون بانبثاق الروح القدس من الاب و الابن ، بينما الارثوذكس من الاب فقط

3-لا يؤمنوا بأسرار الكنيسة السبعة ، مثل التاول و الاعتراف ، و الزواج عند البروتستانت هو عقد و ليس سر كنسي ، كأن عقد بيع و شراء سيارة على سبيل المثال ، و المعمودية ليست سرا عند البروتستنت بل فريضة و تكون عند سن متأخر بالنسبة للارثوذكس

4-لا يؤمنون بالتقليد او بالتسليم الرسولى ، ولا يؤمنوا بأى شئ موروث من اباء الكنيسة ، فقط الكتاب المقدس

5- لا يؤمنوا بالكهنوت ، لايمانهم بأنه يوجد كاهن واحد فى السماء و على الارض هو الله ، ولكنهم قد يتدعوا اسم قسا على احد الخدام

6- الخلاص عندهم بالايمان ، فطالما انت مؤمن اذا انت بلا خطية حتى اذا فعلت جميع الخطايا ، و ان المؤمن لا يهلك مهما سقط

7-ضد الطقوس و ما يتبعها من صلوات طقسية و قطمارس و ابصلمودية ...الخ

8- خلافات فى المعمودية ، فمنهم لا يؤمن بعماد الاطفال و منهم لا يؤمن بالتغطيس بل بالرش ، و عموما المعمودية ليست سرا عند البروتستنت لانهم بالايمان يخلصون

9- ولأن لا يوجد كهنوت ، لا يوجد اعتراف

10- لا يؤمنوا بسر الافخارستيا ، استحالة الخبز و الخمر الى جسد و دم المخلص

11- لا يعترفوا ببعض اسفار الكتاب المقدس ، عدم احترامهم للعهد القديم

12- لا يؤمنوا بالصوم النباتى ، و الصوم الانقطاعى هو اجتهاد فردى غير ملزمين به

13- لا يوجد رهبنة عند البروتستنت ، بأستثناء بعض البروتستنت الالمان

14- لا يؤمنوا بالصلاة على الموتى

15- لا يؤمنوا بالشفاعة

16- عدم اكرام القديسين

17- عدم وجود ايقونات

18- عدم تسمية الكنيسة بأسم قديس او ملاك ، بل بأسم الشارع او الحى (مثلا الكنيسة الانجيلية بالمعادى )

19- الكنيسة هى مجرد بناء عادى جدا مثل الجمعيات ، لا مذبح ولا قبة ولا حجاب ولا منارة

20- لا اتجاه للشرق

21- لا بخور ولا شموع

22- لا صلاة قنديل (سر مسحة المرضى)

23- لا صلاة فى الاجبية ولا المزامير ، ولا حتى الصلاة الربانية (ابانا الذى) و لكن لا مانع من قولها

24- لا يؤمنوا ببتولية العذراء ، ويقولون انها تزوجت فيما بعد من يوسف النجار و انجبت ولدين ، و يرفضون جملة (الممتلئة نعمة) و ينكرون صعود جسدها الى السماء

25- لا يؤمنوا بسلطة الكنيسة ، فلكل واحد الحق فى نشر افكاره دون التقيد بالايمان الواحد من اجل تجديد فكر الكنيسة !!

26- لا يكرمون الصليب ، و لا يبدئوا او ينهوا الصلاة برشمه

27- يؤمنون بعقيدة الاختيار ، وهى تدعى ان الله اختار البعض للخلاص منذ الازل

المصدر العقيدى

كتاب اللاهوت المقارن لقداسة البابا شنودة الثالث

لماذا اضطهاد الاقباط فى مصر

سألت نفسك السؤال ده؟؟

فكك من حوار كفار و مثلثين و مربعين و حصة الاشكال الهندسية دى

فكرت يوما ليه الاقباط بيتعمل فيهم كده؟؟

طب الناس اللى حاطين الاقباط فى دماغهم دول...مش الاولّى ولاد دينهم اللى شغالين فى الحرام  و الدعارة ؟؟

 تلاقى الناس دى مبتعملش حاجة فى حياتها غير انها تقرأ كتب الاقباط و تشاهد قنواتهم و تسئ اليهم على المواقع الاجتماعية ؟؟

طب ليه الناس دى حاطين الاقباط فى دماغهم و محدش شاغلهم فى الدنيا غيرهم ؟؟ الصراحة الكام سطر الجايين هما مجرد تخمين منى للذى يحدث

1- هل كلما تذهب لشراء حاجة ، تجد الاقباط فى وجهك ؟؟ مكتبة جورج ، صيدلية د.مارينا ، البان مارمينا ، مكتبة ابو سيفين ، موبينيل ،  اوراسكوم ، غبور ......

2-هل تشعر بالاستفزاز عندما تسير فى الشارع و تجد كنائس الاقباط-بالرغم من انها نادرة و معدودة عالصوابع- ضخمة و تقع على  مساحة شاسعة و تجدها مليئة بالمصلين ؟؟ و تجد واجهتها من الرخام الفاخر و من الداخل ايضا

3- هل تشعر بالاستفزاز من المبانى الملحقة بالكنيسة ؟؟ او من مستشفيات الكنائس التى تجد فيها خدمة ممتازة و اسعار زهيدة بدون تفرقة بين مسلم و مسيحى ؟؟ او من الخدمات التى تقدمها الكنيسة لشعبها من رحلات ترفيهية و كانتين و بيع جميع انواع المأكولات و بيت للمسنين و مركز للانترنت و الحاسب الالى و اعطاء الكورسات و الخدمات التعليمية و غيرها الكثير ؟؟

4- هل تشعر بالاستفزاز لان فتيات الاقباط و نسائهم غير محجبات ؟؟ و ينتهزون الفرصة و يرتدوا الملابس الخليعة فى الافراح و الاعياد ثم تشعر بالاثارة الجنسية و ترغب بالزواج و لا تجد وظيفة براتب خيالى حتى تتمكن من تكوين مستقبلك حتى تستطيع الزواج ؟؟

5- هل تشعر بالاستفزاز انه بالرغم من الضربات و الاضطهاد التى يتعرض لها الاقباط و الكنائس ، تجد الاقباط يتوافدون على الكنيسة اكثر من ذى قبل ؟؟

6- او هل تشعر بالاستفزاز لانهم يباركوا لاعنيهم و يحبوا اعدائهم ؟؟ او يصمتون و الرب يدافع عنهم ؟؟

7- هل تشعر بالاستفزاز عندما تجد ناصف و انسى و نجيب ساويرس متصدري قائمة اغنياء مصر ؟؟

8- هل تشعر بالاستفزاز عندما تجد هناك تواصل بين جارك القبطى و قسيس الكنيسة ؟؟ و تجد القسيس يأتى اليه كل بضعة اعوام ليصلى له اللقان ؟؟ كيف يستطيعوا التواصل هكذا ؟؟ و كيق يستطيع القساوسة الوصول الى كل هذا الشعب ؟؟

9- هل تشعر بالاستفزاز عندما تجد قبطى لا يريد الهجرة و انه يعشق تراب هذا الوطن ؟؟

10- ام هل تشعر بالاستفزاز عندما تجد اهالى مصابين و شهداء الاقباط و هم فى منتهى السعادة لانهم تألموا او استشهدوا من اجل المسيح ؟؟

11- هل تشعر بالاستفزاز عندما تجد الكنيسة تقيم سنويا لشبابها و اطفالها المسابقات الدينية و الالعاب و دوريات جميع الالعاب الرياضية و التكنولوجيا الحديثة ؟؟ ثم تدعى بأنها دولة داخل دولة ؟؟

اذا كنت من هؤلاء ، فأنت مريض بالتعصب ، او فقير و قد قام احدهم بوهمك بأن الاقباط قد قاموا بسرقة نقود اخوتهم المسلمين حتى اصبح هؤلاء الاقلية اغنى من الاكثرية ، و انه حان وقت الدولة الدينية لاسترداد الاموال المنهوبة ، و الاهم ان تعلم ان احدهم يستغل مرضك هذا حتى يبعد الانظار عنه....أيها المغفل

هل المجلس العسكرى فاسد ؟؟

هل المجلس العسكرى فاسد ؟؟

صراحة، انا مش مهتم انى اجيب دلائل او بمعنى اصح ، مش عارف ، تثبت ان المجلس العسكرى هو المؤسسة الوحيدة الشريفة العفيفة فى مصر ، و ان يد مبارك الملوثة لم تطلها

فى ناس بتقول ان الجيش مؤسسة فاسدة تابعة لمبارك

و فى ناس بتقول ان المجلس العسكرى فاسد و بيتمنوا الضباط يقلبوا عليهم

و ناس تانية عايزة سامى عنان يقلب على طنطاوى

و ناس حاسة ان الجيش فاسد بس عارفه ان روحها فى ايدهم و فاكرة كويس ايام غياب الشرطة حصل فى البلد ايه ، اممال لو الشعب وقف قصاد الجيش هيحصل ايه؟؟

و ناس تانية بتتفرج على اراب جوت تالنت

!!!

ممكن نعرض شوية نقط و محتاجين توضيح او استفسار

للاسف اغلب النقط اللى هقولها دلوقتى ، مش موثقها ولا حاطط معاه اى لينكات من مصادر موثوق بيها عشان حاجتين

اولا:فى حاجات كتير كنت قرأتها و مأحفظتش بنسخ منها لأنى لم اتخل يوما انى سأحتاجها

ثانيا:سعاتك دلوقتى بتقرا مدونة،ممكن يكون صاحبها بيقتى و بيحور ، فسعاتك لازم تكون اولا واعى و فاهم و عارف عن طريق مواقع اخبارية موثوق فيها و تسمع من الناس عن طريق المواقع الاجتماعية زى فيسبوك مثلا ، ولو عديت على كل دول و متابع اول بأول المفروض تكوت قرأت و شوفت الحاجات اللى هكتبها دلوفتى

1-فى موقعة الجمل ، ايه اللى خلى الجيش يسمح للبلطجية بالمرور لميدان التحرير؟؟ و ليه وقف يتفرج على المدبحة و هى بتحصل؟؟

ده بغض النظر عن شهود العيان اللى بيقولوا ان الشرطة العسكرية كانت بتمد جهاز الشرطة بالاسحة يوم 28 يناير..ماعلينا ، نعتبر ان شهود العيان دول كدابين

2-اقامة مبارك فى قصر رئاسي فاخر بشرم الشيخ ، هو فى رئيس مخلوع يقيم فى قصر رئاسي ؟؟

3-بعد تنحى مبارك ، ظل المعتصمون فى ميدان التحرير من اجل بعض المطالب ، و حدث بين المعتصمين و بعض البلطجية مشاجرة ثم تدخل الجيش بعنف للمرة الاولى ضد المتظاهرين و بعدها اعتذر الجيش عن هذا التدخل العنيف و طلب من الشعب السماح لأن رصيده لدى الشعب يكفى ، ثم ظهرت بعض الصور على موقع الفيسبوك تظهر احدى عربات الجيش النقل و هى تحمل البلطجية الذين تشاجروا مع المعتصمين....ايه بقى؟

4-طنطاوى بقاله 20 سنة وزير الدفاع ، و حتى لو بقاله 20 يوم ، هو مبارك هيحط كل رجالته فى كل مناصب البلد و هيجى عالجيش و يحط فيه واحد مش من رجالته ؟؟

5-مظاهرات الجمعة 8 أبريل مقتل 3 أشخاص و اطلاق نار كثيف و 2 من بين الوفيات هم من ضباط الجيش المعتصمين ، و محاولة الامن المركزى فض الاعتصام بالقوة

6-محاولة المجلس العسكرى القضاء على كافة الاعتصامات و المظاهرات عن ظريق قانون سخيق يجرم المظاهرات و يعرض محرضيها للسجن و غرامة قيمتها نصف مليون جنيه

!!!!

و حتى بعد رحيل انس الفقى ، التلفزيون المصرى لا ينقل المظاهرات فى الوقت الحالى بصورة جيدة و لا يبدى مصداقية فى عدد المتظاهرين و المصابين و الشهداء

7- اطلاق المجلس العسكرى سراح الجماعات الاسلامية و فك الخناق على بعض الجماعات كالسلفيين ثم نجد انتشارا واضحا لها ثم نجد استفتاء دستورى لا قيمة له سوى انشغال الناس بامور الدستور و المواد المعدلة و الاخوان و السلفيين و المادة الثانية و الاقباط حتى تجعلها تنسي محاكمة رموز الفساد(و ده اللى ممكن نفسره برفض السلفيين نزول المظاهرات و رفضها مجددا اعتصام 8 أبريل)ء

8- المؤتمر الغريب اللى عمله المجلس العسكرى يوم 9 أبريل و قال فيه حاجات مستفزة بتفكرنا بمبارك زى مثلا ان القوات المسلحة يوم 8 أبريل ماكنتش مسلحة

!!!!

طب نيجى بقى للراجل اللى لو كل مصري شك فى اى حد مش هيشك فى ده

النائب العام ، او النيابة العامة عموما

خد عندك

1- نفس اللى قولته فوق ، اكيد مبارك مش هيسيب منصب النائب العام لواحد ممكن يديله فى ضهره فى اى وقت

2-تباطؤ النيابة العامة فى تجميد ارصدة مبارك و عزمى و حسين سالم و سرور و الشريف و اخرين، و التباطؤ فى التحقيق معهم و محكامتهم ، ازاى يعنى اكبر رؤوس النظام السابق حر طليق و يتحكم فى نقوده و ممتلكاته كما يشاء ؟؟

ده حتى بنوك العالم مش عايزة تجمد ارصدة مبارك ، عشان لغاية دلوقتى ماتوجهتلوش تهمة او اى حاجة حتى

!!!

3- ارسال النيابة العامة لجنة تحقيق لمبارك فى شرم الشيخ فى قصره الرئاسي !!!! طب و ياترى تفتكروا ممكن الريس يتسجن بعد

التحقيق زى زكريا عزمى مثلا ؟؟ ولا هيأمروا بحبسه فى احدى حمامات السباحة الدافئة الفاخرة فى قصره؟؟

4- عدم اتخاذ اى قرار ضد الحزب الوطنى الديمقراطى رغم انه أس الفساد

5-بعض رجال الاعمال مثل ابو العنين اختفت اخباره مرة واحدة بعد عدة اخبار بتعقب ثرواته ، و احد تلاميذ مبارك المخلصين (احمد شفيق)كان ثمن فساده فى مصر للطيران هى حملة ترشحه للرئاسة

6- افتكاسة قانون غريب ان اللى سرق اراضى مصر يرجعها و ميتحاكمش بدل مايتحاكم و الاراضي مترجعش ، طبعا صباح التزوير بالقانون ده

ياريت يطلع الجيش و النيابة العامة شرفاء و احنا غلطانين !!! ياريت صدقونى

بين الاخوان و السلفيين

 طبعا كلنا عارفين حكاية الاخوان...
بداية الاخوان انها كانت جماعة دينية بحتة ، تختص بالامر بالمعروف و النهى عن المنكر و رفعة شأن الاسلام ...الخ ، و اصبحت الجماعة تهتم بالسياسة الى ان اصبحت جماعة سياسية بحتة ثم الان حزب سياسي تحت التأسيس ، و اظن ايضا انهم سيظلون يستعملون الشعارات الدينية ، و بسبب ذلك اصبحت الجماعة مكروهة من الشعب لانها تعمل بالسياسة تحت مسمى دينى

اما الجماعة السلفية ، فرغم انها ليست منظمة اطلاقا على عكس الاخوان و ليس عدد منضميها بالضخامة التى للاخوان ، الا انها تتمع بعدد مؤيدين كبير جدا يصل لاضعاف عدد الاخوان فى مصر، و نجد ان المؤيدين هم غالبا جهلاء ، ولا اقصد جهلاء انهم غير متعلمين او اشياء من هذا القبيل ، بل اقصد هؤلاء الطبقة من عديمى التفكير من الاطباء و المهندسين و المحاسبين و جميع طوائف و فئات الشعب

و لأن المواطن المصرى-بغض النظر عن ديانته-مؤمن بالله ولأنه لايستطيع ان يخافه و يقع فى كثير من الخطايا ولا يستطيع طاعة الله ، فهو يحاول ان يفعل اى شئ دنيوى يخلى صورته حلوة فى يوم القيامة-ده من وجهة نظره-فبعض المصريين فاكرين لما يقللوا من شأن الاديان الاخرى او يكفروا ابناء بلدهم من الديانة الاخرى و اتهامهم بانهم اغتصبوا البلد او عاوزين يفرضوا ديانة معينة ، حيبقى مصيره الجنة !!!!

نرجع لموضوعنا ، فالمصرى لما يلاقى جماعة زى السلفيين ، و طبعا مش محتاج اكتب عنهم ، حيقول و الله فى لسه ناس بتخاف ربنا اهو ، بارك الله فيهم
و حتى لما اعلن السلفيين انهم هينشأوا حزب سياسي ، المفروض على طول الواحد يفتكر جماعة الاخوان ، لكن برضه مفيش دماغ ، ده حتى كمان تلاقيه مؤيد عشان وقتها لما يمسك البلد يعمل اللى عاوز يعمله من غير اعلام يهاجمه ولا حد يقوله بتعمل ايه ، مع انه عارف برضه ان السياسة تفسد الدين و ان الدين مرتبته اعلى بكتير من السياسة بس تقول ايه بقى
و الصراحة انا بحب اقرا من السلفيين كتير و عنهم كمان ، و بحب اسمع الكلام الغريب اللى بيقولوه ، زى ان امن الدولة هو اللى اخد كاميليا بالقوة و رجعها للكنيسة ، و كأن امن الدولة هو احد الاجهزة التابعة للكنيسة القبطية
!!!!!
 معلش بلد اغبياء
و بعيدا عن موضوع كاميليا لان المستنيرين من المسلمين يؤمنوا بان كاميليا الكنيسة حابساها فى دير قبل المتعصبين ، نرجع نقول ان السلفيين ناس صاحية جدا ، فلما قام كثير من اغبياء الاقباط فى مصر بطلب حذف المادة التانية من الدستور (حذف مرة واحدة ياولاد الهبلة) كان السلفيين لهم بالمرصاد و خرجوا فى مظاهرات رغم عدم نزولهم لمظاهرات ثورة 25 يناير ، و اللى مش عارفه لغاية دلوقتى هما منزلوش ليه ؟؟ طب الكنيسة قالت للناس متنزلوش عشان عارفين قوة الجماعات الاسلامية فى مصر و انها حاليا
 اقوى من اى حزب او ناشط سياسي، طب السلفيين ليه مش عارف
 هؤلاء الاغبياء من الاقباط فاكرين انهم ممكن واحدة واحدة  ممكن ياخدوا حقوقهم الشرعية بسهولة عن طريق شوية مطالب مستحيلة ، و ناسيين انهم مش محصلين 10 او 15% من الشعب و لو كل مسلم نزلهم بسكينة المطبخ مش هياخدوا فى ايدهم غلوة

الصراحة الاقباط فى مصر متبهدلين كتير بس ده مش سبب انهم يتصرفوا بالغباوة دى ، و كمان كلهم هجموا مرة واحدة على الحزب بتاع ساويرس ده ، و انا مسميه حزب الاقباط ، و اصدقائي عالفيسبوك كلهم انضموا للصفحة بتاعته و بينشروا الحزب و يقولوا ده حزب ساويرس يا جماعة يلا كلنا ندخله
طب ما فى كذا حزب ليبرالى تانى اشمعنا ده يعنى ؟؟ و هوا ساويرس ده يعنى مش هيجيبلكوا غير المشاكل لانه مكروه من شريحة كبيرة من المصريين لانه نصرانى كافر هو و عائلته و للاسف هما اغنى ناس فى مصر و (واكلين فلوس البلد)!!! شوفتوا بقى ؟
و طبعا الحزب ده اتعلم عليه لان المسلمين كلهم دلوقتى بيقولوا الحزب ده عاملينه الكفار عشان يلغوا المادة 2 من الدستور
!!!
 و نفس الاقباط هما اللى كانوا بيطالبوا بساويرس رئيسا لمصر قبل مايعمل الحزب اياه
ماينفعش واحد زملكاوى يحكم البلد طالما اغلبية اهلاوية و فى عداء مابين الطرفين و اضطهاد من فئة الاهلاوية الاكثر عددا للزملكاوية الاقل عددا ، تيجى ازاى يعنى
و نفس الاقباط اللى بيقولوا ان مصر دوله اساسا مسيحية قبل الاسلام مايدخل مصر و انهم هما اللى ضيوف، و اغبياء المسلمين بيقولوا مصر اسلامية اسلامية و الاقباط دول ضيوف عندنا و واجبنا نحميهم (و طبعا لو حبوا يتمنظروا نديهم بالكرباج ماهما ضيوف عندنا بقى) و اللى مش عاجبه عنده فيزا امريكا و كندا
!!!!!
يلا ماهو غباوة بغباوة بقى
مافيش حاجة اسمها دى بلد اقباط ولا مسلمين ، دى بلد المصريين ، و على فكرة المسلمين مدخلوش مصر بلطجة ولا حاجة ، و الناس دى بتحارب و تدافع عن البلد من زمان تبقى بلدهم ولا لأ ؟؟ و الاقباط دول اساسا موجودين قبل المسلمين و برضه بيدافعوا عن البلد تبقى بلدهم ولا لأ ؟؟ هو مش البنى ادم لما يقعد 5 سنين فى امريكا بيبقى امريكانى ؟؟
للاسف ستظل طبقة الجهلاء و الاغبياء من المصريين هى المسيطرة
و دلوقتى اللى عايز يلعب على حد يكسبه فى الانتخابات ، اكيد هيفكه من شباب النت اللى مش محصلين 0.5% من شعب مصر ، و لازم ينزل لطبقة الجهلاء و الحمير و البهائم و يكسبهم بأى شكل

يقولهم لو اخترتم فلان  هيحكم مصر ناس كفرة ، يوزع عليهم وجبات ، سكر زيت اى حاجة ، الناس دى كده كده مابتفكرش  و عمرها ما هتفكر

للاسف الناس كلها بيفكروا ان اللى هيوصل للبرلمان و الرئاسة جماعات دينية ؟؟ ولا مستقل معتدل؟؟ ولا ليبرالين و علمانيين كفار ؟؟ بغض النظر عن كل دول ، انا شايف ان اللى يوصل لازم هيكون مغمض عينه ناحية النظام السابق الحالى (مبارك +النائب العام+المجلس العسكرى) ميدعبسش وراهم ، و ميسألش كتير عنهم ، ازاى بقى الجيش هيسمح لحد يوصل للكرسي من غير مايدعبس دي ...مش عارف
!!!!